Limited liability partnership

എന്താണ് എല്‍എല്‍പി?

Business

1932 ലെ ഇന്ത്യന്‍ പാര്‍ട്ണര്‍ഷിപ് നിയമപ്രകാരം ഏതെങ്കിലും പാര്‍ട്ണര്‍ മരിക്കുകയോ പാപ്പരാവുകയോ സ്ഥിരബുദ്ധി ഇല്ലാത്തവനാവുകയോ ചെയ്താല്‍, ആ പാര്‍ട്ണര്‍ഷിപ് അവസാനിക്കുന്നു. മറ്റ് പങ്കുകാര്‍ക്ക് കച്ചവടം തുടരുവാന്‍ കൂട്ടുകച്ചവട സംരംഭം ആദ്യം മുതല്‍ പുനഃസംഘടിപ്പിക്കേണ്ടതുണ്ട്. കാരണം പാര്‍ട്ണര്‍ഷിപ്പുകള്‍ക്ക് സ്ഥായിയായ നിലനില്‍പ്പില്ല എന്നതാണ്. ഈ പ്രശ്‌നം പരിഹരിക്കുവാനും പാര്‍ട്ണര്‍ഷിപ്പുകളെ കോര്‍പ്പറേറ്റുവല്‍ക്കരിക്കുവാനുമായിട്ടാണ് 2008 -ല്‍ ലിമിറ്റഡ് ലയബിലിറ്റി പാര്‍ട്ണര്‍ഷിപ് നിയമം നടപ്പിലാക്കിയത്. അങ്ങനെയാണ് എല്‍എല്‍പികള്‍ നിലവില്‍ വന്നത്.

പാര്‍ട്ണര്‍ഷിപ്പുകളില്‍ ഓരോ പാര്‍ട്ണര്‍ക്കും സംരംഭത്തിന്റെ മുഴുവന്‍ ബാദ്ധ്യതകള്‍ക്കും ഉത്തരവാദിത്തമുണ്ട്. എന്നാല്‍ എല്‍എല്‍പികളില്‍ പാര്‍ട്ണര്‍മാരുടെ ബാദ്ധ്യത അവരുടെ ഓഹരിമുതല്‍മുടക്ക് തുകയില്‍ ക്ലിപ്തപ്പെടുതായിരിക്കുന്നു. അതായത്, എല്‍എല്‍പിയിലെ പാര്‍ട്ണര്‍മാരെ, അവരുടെ ഓഹരിക്കപ്പുറം, സ്ഥാപനത്തിന്റെ കടബാദ്ധ്യതകള്‍ മുഴുവന്‍ കൊടുത്തുതീര്‍ക്കുവാന്‍ നിയമപരമായി നിര്ബന്ധിക്കുവാന്‍ ആവില്ല, അതിനാലാണ്, സാമ്പത്തിക ഇടപാടുകള്‍ പോലുള്ള അപകടം പിടിച്ച ബിസിനസ്സുകളില്‍ ഏര്‍പ്പെടുന്നവര്‍ എല്‍എല്‍പി രൂപീകരിക്കുന്നത്.

1934-ലെ റിസര്‍വ്വ് ബാങ്ക് നിയമം വകുപ്പ് 45 ഐഎ പ്രകാരം, കമ്പനി നിയമപ്രകാരം രജിസ്റ്റര്‍ ചെയ്യാത്ത സ്ഥാപനങ്ങള്‍ക്ക് ബാങ്കിങ്-ഇതര ഫിനാന്‍സ് കമ്പനിയായി പ്രവര്‍ത്തിക്കുവാന്‍ അനുവാദമില്ല. 2013-ലെ കമ്പനി നിയമത്തിലെ ഏഴാം വകുപ്പ് പ്രകാരം കമ്പനിയായി രജിസ്റ്റര്‍ ചെയ്ത ശേഷം, അവ വീണ്ടും റിസര്‍വ്വ് ബാങ്കിന് മുന്‍പാകെ നോണ്‍-ബാങ്കിങ് ഫിനാന്‍സ് കമ്പനിയായി രജിസ്റ്റര്‍ ചെയ്യണം. റിസര്‍വ്വ് ബാങ്കിന്റെ കര്‍ശന നിയന്ത്രണങ്ങള്‍ക്ക് വിധേയമായി മാത്രമേ അവയ്ക്ക് പ്രവര്‍ത്തിക്കുവാന്‍ ആകൂ. എന്നാല്‍ 1982-ലെ ചിട്ടി ഫണ്ട് നിയമത്തിന്റെ പരിധിയില്‍ വരുന്ന ചിട്ടിക്കമ്പനികളെ ഈ നിബന്ധനയില്‍ നിന്ന് ഒഴിവാക്കിയിട്ടുണ്ട്.

ഈ പഴുതുപയോഗിച്ച്, റിസര്‍വ്വ് ബാങ്ക് നിയമത്തില്‍ നിന്ന് രക്ഷപ്പെടുവാനാണ് പല സ്വകാര്യ ഫിനാന്‍സ് കമ്പനികളും ചിട്ടിക്കമ്പനി ആയി രജിസ്റ്റര്‍ ചെയ്യുന്നത്. ഉടമസ്ഥന്മാര്‍ക്ക് സ്ഥാപനത്തിന്റെ കടബാദ്ധ്യതകളില്‍ നിന്ന് ഒഴിഞ്ഞുനില്‍ക്കുവാന്‍ അവയെ എല്‍എല്‍പി ആയി സംഘടിപ്പിക്കുകയും ചെയ്യുന്നു.

ഇപ്പോള്‍ നടന്നത് പോലുള്ള തട്ടിപ്പുകള്‍ ഇല്ലാതാക്കുവാന്‍ പണമിടപാടുസ്ഥാപനങ്ങള്‍ എല്ലാം തന്നെ, അവയുടെ ഘടനാസ്വഭാവം എന്തായാലും, റിസര്‍വ്വ് ബാങ്ക് നിയമത്തിന്റെ പരിധിയില്‍ വരുത്തേണ്ടതുണ്ട്.

(പ്രമുഖബാങ്കിലെ ഉയര്‍ന്ന ഉദ്യോഗസ്ഥനാണ് ലേഖകന്‍. അഭിപ്രായങ്ങള്‍ വ്യക്തിപരം)

Summary:

Share this